காதல் அத்தியாயங்கள்

கடவுளே,
நான் காதலனாய் வாழ்வேன் என்றால் மட்டும் பிறக்க விடு,
இல்லையேல் கருவிலே என்னை அழித்து விடு.



அத்தியாயம் - 3

சென்னையில் வேலைக்கு சென்ற புதிதில் பொங்கலுக்கு ஊருக்கு வந்த நான் உன்னையும் பார்க்க வந்தேன். நீண்ட நாட்களாக எதிர்பார்த்து கொண்டிருந்த நீ என்னை கண்டவுடன், "எப்படி இருக்கீங்க, பட்டிணமெல்லாம் எப்படி இருக்கு?" என்றாய்.
உன்னை சீண்டி பார்க்க வேண்டி,"ஊரும் நல்லா இருக்கு, பொண்ணுங்களும் செமையா இருக்காங்க" என்றேன்.
சட்டென்று வாடிய முகத்துடன்,"செமையா இருக்காங்கனா எப்படி, எதுல?" என்றாய்.
நானும் விடாமல், "ஆகா....அவங்களோட லொ-கட் டாப்சும், தொப்புள் தெரியிற மாதிரி எப்ப வேணாலும் கீழ விழற பேண்ட்ம், வாய் நிறைய இங்கீலீசும், அடடா...மனசுல நிக்குது" என்றேன்.
கண்களில் நீர் முட்ட," நானெல்லாம் அப்ப உங்களுக்கு இனிமே தேவையில்லை. அங்கேயே எவளையாவது கட்டீகீங்க.இங்க இருக்குற தாவணி,சேலையெல்லாம் உங்களுக்கு அலுத்திருக்கும். என்னை இனிமே பார்க்க வரவேண்டாம்" என முடிக்கும்போது அழுதுவிட்டாய்.
இதற்கு மேல் உன்னை துன்புறுத்த விரும்பாமல்,"கண்ணம்மா, இப்ப நான் என்ன சொல்லிடேன்னு அழற, ஆயிரம்தான் அவங்க அப்படியிருந்தாலும் என் தேவதைப்போல வருமா. இதுக்கு போய் என்னைய வரவேண்டாம்ன்னு சொல்ற, அப்ப நான் நாளை உங்க வீட்டுக்கு வர வேண்டாமா?"என்றேன்.
நீ ஆச்சரியத்துடன்," எங்க வீட்டுக்கு எதற்கு? என்னை மாட்டிவிடறதுக்கா?" என்றாய்.
"உங்க வீட்ல உன்னைய பொண்ணு கேட்கலாம்ன்னுத்தான்"
"அப்படியா, உங்க வீட்டுல நம்ம கல்யாணத்துக்கு ஓத்துக்கிட்டாங்களா?" என்றாய் முகமலர்ச்சியுடன்.
"ஆமாம், அதச்சொல்லத்தான் வந்தேன்"
"அதத்தானே முதல்ல சொல்லனும்.என்னை அழ வைச்சி அப்புறமா சொல்றீங்க. நீங்க சும்மாத்தான் அந்த பொண்ணுங்க பத்தி சொல்றீங்கன்னு தெரியுது. ஆனாலும், விளையாட்டுக்கு கூட என்னை ஓதுக்குறமாதிரி பேசும் போது வருத்தமாயிருக்கு" என்றாய்.

என்னவளே! காதல் என்பது அப்படித்தான், கண்ணாமூச்சி விளையாட்டுப்போல. ஊடலுக்கும், கூடலுக்கும்யிடையில் இருந்து விளையாடி பார்க்கும்.

இரவில் சூரியன்...

சமுதாய அவலங்களில் என்னை பாதித்த ஒன்று 'பாலியல் தொழில் செய்பவர்கள்'. அவர்களுடைய இந்த நிலைமைக்கு யார் காரணம்? அவர்களேவா அல்லது இந்த சமுதாயமா?

முகம் தெரியாத அவர்களுக்கு இந்த கவிதை சமர்பணம்.


எல்லோருக்கும் இரவில்
உறங்கும் சூரியன்,
எங்களுக்கு மட்டும்
பகலில்.

உயிர்களிடத்தில் அன்பு
காட்டவேண்டுமாம்,
எங்களாலும் முடியும்
மனிதர்களை தவிர
மற்றவைகளிடம்.

வாழத்தான் வேண்டியுள்ளது
ஆறுதல் கூறிகிறேன் என்று,
'அவன் எங்கெல்லாம் தொட்டான்'
என கேட்பவர்களிடையிலும்,
ஆதரவு தருகிறேன் என்று,
அந்தரங்கத்தை தொடுபவர்களிடையிலும்.

விலை மதிப்பில்லாததாம் கற்பு,
கூவாமலும் கூசாமலும் அதைத்தான்
வீதியில் விற்கின்றோம் தினமும்
விலை வைத்து.

காந்தியின் கனவை
நனவாக்க இரவில்
தனியாக நடப்போம்.
என்ன அதிகமாக போனால்,
அன்றைய உழைப்பிற்கு
ஊதியம் இருக்காது.

இறுதியாக என் தாயிடம்
ஒரு விண்ணப்பம்.
'தயவு செய்து என் அப்பன்
யாரென்று சொல்லிவிடு'.
அவனை தெரிந்துகொள்வது,
என்னின் இந்த நிலைமைக்கு
நியாயம் கேட்கவோ,
ஆறுதலாக அவன் தோள்களில்
சாய்ந்துக்கொள்வதற்கோ அல்ல.
என்னுடைய இரவுகளில் அவனை
சந்திக்காமல் இருப்பதற்கு.

ரஜினி, கமல் மற்றும் விகடன்.....

கடந்த வார விகடனில் நம்பர் 1 கொண்டாட்டமாக ரஜினியின் ஆன்மிக பயணம் மற்றும் கமலின் பேட்டியும் வெளியானது. அதை பற்றிய என் கருத்துக்கள்......

முதலில் நம்பர் 1 இடத்தை பிடித்த விகடனுக்கு வாழ்த்துக்கள்.
இன்றைய இந்திய திரையுலகில் தவிர்க்கப்படமுடியாத இருவர் ரஜினி மற்றும் கமல். இந்த இருவரின் பேட்டியும் பல பத்திரிக்கையில் பல தருணங்களில் வெளிவந்திருந்தாலும் இது தான் எனக்குள் பல சிந்தனைகளை தூன்டிவிட்டது.

முதலில் ரஜினியின் ஆன்மிக பயணம் பற்றி.....



ரஜினி ரிஷிகேஷ் செல்வது பற்றி அவ்வப்போது செய்திகள் வந்தாலும் இந்த வார விகடன் நமக்கு அவர் செல்லும் இடம் பற்றி தெளிவுபடுத்தியுள்ளது. பல கோடி மக்களால் கொண்டாடபடும் நபர் ஒரு பரதேசி போல எந்த ஒரு பகட்டும் இல்லாமல் இருப்பது அவருடைய பக்குவத்தை காட்டுகிறது. வேறு எதையும் விட தெய்விகத்தை அறிவது தான் முக்கியம் என்பது இவரிடமிருந்து நாம் கற்றுக்கொள்ள வேண்டியது. அளவுக்கதிகமான புகழ், பணம் மற்றும் வசதிகள் எல்லாம் சலித்து விடும். ஆனால் தெய்விகம் ஒன்று தான் சலிக்காதது என்பது நமக்கு பாடம்.

அடுத்து கமலின் பேட்டி...

கமலின் 35 வருட பகுத்தறிவு வாழ்க்கைக்கு விருது (ஏ.டி.கோவூர் நேஷனல் அவார்ட்) கிடைத்திருப்பத்ற்கு வாழ்த்துக்கள். தான் ஒரு யதார்த்தவாதி என்பதை இப்பேட்டியின் மூலம் மீண்டும் கமல் காட்டிவிட்டார். தான் தமிழில் பெயர் வைப்பதே ஒரு செய்தியாகி விட்டதாக அவர் கவலைப்பட்டிருப்பது நமக்கும் வேதனை தருகிறது. கெளதமிக்கும்,தனக்கும் உள்ள உறவு பற்றி அவர் கூறியிருக்கும் விதம் அவர் நேர்மையை காட்டுகிறது. தன் மகளின் திருமணம் பற்றியும், பிற மொழி படங்களில் நடிப்பது பற்றியும் அவர் கூறியிருக்கும் விதம் சிறப்பு.

உயர்ந்த இடத்தில் இருந்தாலும் எந்த ஒரு போலித்தனமும் இல்லாமல் இவர்கள் இருப்பது நமக்கு ஒரு பாடம்.

Photo by: vikatan.com

காதல் அத்தியாயங்கள்....

தயவு செய்து தூங்கும் போது
என்னை எழுப்பாதீர்,
என் தூக்கம் கலையும் என்ற
கவலை இல்லை எனக்கு,
என்னுள் உறையும் என்னவளின்
தூக்கம் கலைய கூடாது என்ற
கவனம் எனக்கு.

அத்தியாயம் - 2

நம்முடைய காதல் நம் இருவர் வீட்டிற்கும் தெரியவந்தபின் ஒரு நாள்."இன்னைக்கு உங்க அப்பா, அம்மாவை பார்க்க போறோம்ன்னு சொன்னிங்க இல்லயா. எனக்கு ரொம்ப பயமா இருக்கு" என்றாய்.
"இதுல பயம் என்ன இருக்கு. நான் தான் உன் கூட இருப்பேன் இல்லையா"
சற்றே வருத்ததுடன் ஆரம்பித்தாய், "உங்க வீட்ல என்னைய திட்டுவாங்ளோன்னு பயம் இல்ல. எனக்கு வேற பயம் தான்."
"என்னடி குழப்புற! திட்டமாட்டாங்க, பயம் இல்ல, பயமா இருக்குன்னு மாத்தி மாத்தி சொல்ற".
நீ மெதுவாக ஆரமித்தாய், "உங்க வீட்டில ஆசாரம் பாப்பாங்களா."
"ஆமாம் கொஞ்சம் இல்ல ரொம்பவே பாப்பாங்க. அதுக்கு என்ன இப்ப"
நீ கண்களில் நீர் முட்ட, "என்னங்க உங்களுக்கு கொஞ்சம் கூட என்ன பத்தின கவலையே இல்ல. நீங்க சுலுவா சொல்லிட்டீங்க. என் கஷ்டம் எனக்கு தான். இப்ப என்னைய எத்துக்கிட்டலும் பின்னால இதுவே பெரிய பிரச்சனையா மாறிடகூடாதுன்னு கவலையா இருக்கு" என்றாய்.
"அடி பைத்தியமே! நீ கவலையே பட வேண்டாம். அவங்க பாக்கற ஆசாரம்யேல்லாம் சாதாரண மக்களுக்கு தான். உன்னைய மாதிரி தேவதைக்கு இல்ல" என்றேன் உன் கண்களை பார்த்து.
வெட்கத்தால் கன்னம் சிவக்க என் மார்ப்பில் புதைந்தப்படி நீ கேட்டாய், "பொறுக்கி, எங்கேயிருந்து இப்படியெல்லம் பேச கத்துக்கிட்ட".
"காதலிடமிருந்து தான் கத்துக்கிட்டேன்" என்றேன்.
எனக்கு தெரியும் நான் பொய் சொல்லவில்லை.

என் அலமாரியிலிருந்து....

தேவதைகளின் காலம் - அழகு நிலா

பல நாட்களுக்கு பின் என் சொந்த ஊரான தஞ்சாவூர்க்கு கடந்த வாரம்
சென்றிருந்தேன். அங்கு நடந்துகொண்டிருந்த புத்தக கண்காட்சிக்கு சென்றிருந்தபோது இப்புத்தகம் என் கண்ணில் பட்டது. அடிப்படையில் புத்தகத்தின் தலைப்பு மற்றும் அட்டை படத்தினால் ஈர்க்கப்பட்ட நான், பின் இரண்டொரு பக்கங்களை படித்தபின் வாங்கி விட்டேன்.
இனி புத்தகத்தை பற்றி....

கவிதை என்பது யாரும், எதைப்பற்றியும், எப்படியும் எழுதலாம்
என்ற இன்றைய நிலையில் இக்கவிதை தொகுப்பு ஒரு தரமான படைப்பு.
ஆசிரியர் அழகு நிலா. இயற்பெயரா அல்லது புனைபெயரா தெரியவில்லை.
ஆனால் பெயரே கவிதையாக உள்ளது. கவிதைகளும் மிகவும்
சிக்கனமாகவும் யதார்த்தமாகவும் உள்ளது.

கவிதைக்காக கருப்பொருளைத் தேடாமல் அன்றடம் வாழ்வில் நடக்கும்
சம்பவங்களையும், எதிர்கொள்ளும் பிரச்சனைகளையும் கொண்டு
படைத்திருப்பது இத்தொகுப்பின் மற்றுமொரு சிறப்பு. உதாரணமாக,

பசு அறுத்துப் பச்சை இரத்தம்
குடிக்கும் ஆதிவாசியுடன்
நேசம் பாராட்டத் தோன்றுகிறது
பேரிடியாக இங்கு
ஏதாவது நிகழும்போதெல்லாம்.

மேலும் இவரது கவிதைகளில் ஒரு தத்துவார்த்தியின் சிந்தனைகளையும், அதை அடைய முயலும் சாமான்னியன்னின் ஆசைகளையும் ஒருங்கே காணமுடிகிறது. வீட்டிலிருந்து ஆரம்பித்து, பூமி, வானம், அண்டம், பேரண்டம் என இவரது சிந்தனைகள் பரவியிருப்பதை அறியமுடிகிறது.

சட்டென்றுத் தோன்றி மறைந்து
தீர்வாக அப்பிக் கிடக்கும்
மின்னல் இருட்டில்
காலத்தை நிறுத்தி
கதவடைத்த அறைகளுக்குள்
சொற்களின் உச்சமாய்
புரிதலில் என்சியிருக்கும்
இந்த ஆழ்வெளி மெளனம்
விழித்திரையில் படிந்து
மீள மறுக்கிறது.

மனிதவாழ்வு என்பது பலவிதமான விசாரனைகளையும், விவாதங்களையும்
கொண்ட ஒரு தொகுப்பு என்பதை இவரது அழகாக எடுத்து காட்டுகிறது.
ஆண், பெண் உறவுகளை இவர் கையாளும் விதம் அருமை. புத்தகத்தை
முழுவதும் படித்து முடித்த பின்பு, இன்னும் கவிதைகள் இருந்திருக்க கூடாதா என்ற எண்ணம் எற்படுகிறது. அது தான் ஒரு எழுத்தாளளின் வெற்றி என்பதோ!

தலைப்பு: தேவதைகளின் காலம். ஆசிரியர்: அழகு நிலா.
குமரன் பதிப்பகம், சென்னை - 17. விலை: ரூ. 50.

காதல் அத்தியாயங்கள்

காதல் சாமானியனையும் அரசனாக்கும், அரசனையும் சாமானியனாக்கும். அதற்கு அவ்வளவு சக்தி உண்டு.
உலகம் முழுவதும் ஏற்று கொள்ளும் ஒரெ தத்துவம் காதல்.
காதலால் ஆளபடும் நான், என் மனதில் தோன்றியவைகளை எழுதுகிறேன்.......

இறைவா,
இனி ஒரு பிறவி உனக்கு இல்லை
என்றவரம் மட்டும் தந்து விடாதே!
அவளை காதலிக்க இந்த ஒரு
பிறவிமட்டும் எனக்கு போதாது.


அத்தியாயம் - 1

அன்றொரு நாள் மாந்தோப்பில் அம்ர்ந்து பேசிக்கொண்டிருந்தோம். "உங்களுக்கு என்னவெல்லாம் பிடிக்கும்?" - திடீரென்று கேட்டாய்.
"எதற்காக?"
"சும்மா சொல்லுங்கள்" என்றாய்.
நான் சிறிது யோசித்து விட்டு, " ம்... அதிகாலை நேரம், மண்வாசனை, நீர் நிறைந்த பொன்னியாறு, சிவன் கோயில்,..." நான் பேச பேச உன் கண்கள் கலங்குவதை கண்ட நான், பேச்சை நிறுத்தி, "என்னடா, என்னாச்சு" என்றேன், உன் கண்களை துடைத்தபடி.
நீ சினுங்கலுடன் ஆரம்பித்தாய், "என்னைய யாராவது உனக்கு என்ன பிடிக்கும் என்றால், உங்கள தவிர வேறொன்றும் தெரியல, ஆனா நீங்க என்னைய மறந்துட்டு எல்லாத்தையும் சொல்றிங்க" என்றாய்.
"அடி பைத்தியமே, இதுக்கு போயி அழுதியா, எனக்கு இதுவெல்லாம் பிடிக்கிறதே உன்னைய காதலிக்க ஆரம்பிச்சதப்பறம் தான்" என்றேன்.
"பொய் சொல்றீங்க, இல்ல நீங்க சொல்ரது நிசம்ன்னா எனக்கும் பொன்னியாத்துக்கும் என்ன சம்பந்த்ம் சொல்லுங்க" என்றாய்.
"அதுவா நிறைய இருக்கு. பொன்னியாறு தன் அழகான மேடு, பள்ளங்களையெல்லாம் தண்ணீரை சேலையாகவும், கரையோர மரங்களை சேலையின் தலைப்பாகவும் கொண்டு மறைச்சிடிருக்கு இல்லையா, அது போல நீயும்...." என்றவுடன், உன் அழகான கையால் என் வாயைப்பொத்தி, உன் முகம் கொள்ளா வெட்கத்துடன், "போதும் போதும், பொறுக்கி, நீ என்ன சொல்ல வர்றன்னு தெரியுது" என்று என் தோளில் உன் முகத்தை புதைத்துக்கொண்டாய்.
அட, எனக்கு இதுவும் பிடிக்கும்!
(இன்னும் சொல்வேன்......)

ஒரு பதிவின் கதை

ஒரு பதிவின் கதை

ஒரு மழை நாளின் மாலையில் நண்பர் தேசிகனை (http://desikann.blogspot.com) சந்திப்பதற்காக அவர் வீட்டிற்கு சென்றிருந்தேன். அவர் படிக்கும் புத்தகங்கள் பற்றியும் அவர் எழுதின பதிவுகள் பற்றியும் பேசிக்கொண்டிருந்தோம். வீட்டில் யாரும் இல்லாததால் அவர் எனக்கும், அவருக்குமாக காபி கலந்து கொண்டிருந்தவர், "நீ ஏன் ஒரு பிளாக் எழுதக்கூடாது" எனக்கேட்டார்.
"சார் என்ன ஜோக்கா"
"இல்லப்பா, நீ கவிதை, கட்டுரையின்னு ஏதோ எழுதற. அதை பல பேர் பார்க்கட்டுமே"
"சார், நான் பல பேர் முன்னாடி அவமானபடனும்கிறது உங்க ஆசையா" அதற்கு அவர், "இதுல அவமானம், வெகுமானம் ஒன்னுமில்ல. அவரவர் மனசில இருக்குறத பகிர்ந்துக்கிறத்துக்கு தான் பிளாக் வைச்சிருக்கா.நீ தைரியமா எழுது. எழுத எழுத தான் பழகும். இந்த வாரத்துல தமிழ் புத்தாண்டு வருது, அன்னைக்கு பிளாக் ஆரம்பிச்சுடு" என்றார்.
"சரி ஆரம்பிக்கிறேன். பிளாக்கிற்கு ஏன்ன பெயர் வைக்கலாம், சொல்லுங்கோ". "பெயர் என்னப்பா பெருசா! ஏதாவது சின்னதா, வாயில நுழையற பெயரா வை."
"வாயில நுழையற பெயருனா, இட்லி-வடைன்னு தான் வைக்கனும். அதுவும் நண்பர் ஆனந்த் கோபாலன்(http://idlivadai.blogspot.com) ஏற்கனவே வைச்சுட்டார். நான் பொங்கல்-வடை, அடை-அவியல்ன்னு try பன்னட்டுமா" என்றேன்.
"இந்த நக்கலுக்கு ஒன்னும் குறைவு இல்லை. ஏதாவது வைச்சி ஆரம்பி" என்றார்.
ஏனவே நேயர்களே, நண்பர் தேசிகனின் வழிகாட்டுதலினால் இதோ என் வலைப்பதிவு உங்கள் பார்வைக்கு......
ஆரோக்கியமான விமர்சனங்கள் தான் ஓருவனை வளர்க்க முடியும் என்பதை அறிந்தவன் நான். எனவே உங்கள் விமர்சனங்களுக்காக காத்திருக்கும் உங்கள் அன்பு மித்ரா (சாய் கிருஷ்ணா).